«Боко Ҳарам» гаровга олган 178 киши озод этилди
DW нашрининг ёзишича, Нигериянинг шимолида жойлашган Борно штатида ўтказилган ҳарбий операцияда «Боко Ҳарам» асирга олган 180 га яқин киши озод этилган. Гаровга олинганлар 67 аёл, 101 ёш бола ва 10 эркак киши бўлган. Бундан ташқари, Нигерия армияси вакили полковник Тукур Гусау (Tukur Gusau)нинг баёнотига кўра, гуруҳнинг бошлиғларидан бири тириклайин қўлга олинган ва қўпорувчиларнинг бир неча лагери йўқ қилинган.
Охирги пайтлар Нигерия армияси «Боко Ҳарам» гуруҳига, айниқса, мутаассиблар ўчоғи бўлган Самбиса чангалзорига босимни кучайтирган.
БМТ маълумотларига кўра, 6 йилдан бери давом этаётган террористлар билан курашда 15 000 дан ошиқ киши ҳалок бўлган.
Ибн Маъруф таржимаси