Мянма ҳукуматига «Бутунжаҳон Магнитский қонуни» орқали жазо берилиши мумкин
АҚШ Ракхайн (Аракон) штатида инсон ҳуқуқларининг бузилиши туфайли Мянма ҳукуматига нисбатан чекловлар қўймоқчи, жумладан, «Бутунжаҳон Магнитский қонуни»ни қўлламоқчи, деб хабар беради РИА «Новости».
«Биз АҚШ қонунчилиги, жумладан, «Бутунжаҳон Магнитский қонуни»га мувофиқ мақсадли жазолаш механизмларини кўриб чиқмоқдамиз», – дейилади Давлат Департаменти баёнотида. АҚШ маъмурияти аввалроқ Мянма билан ҳарбий-техник ҳамкорлик дастурини тўхтатиб қўйган эди. Вашингтон Мянмани тинчлик ва хавфсизликни таъминлашга, «юқори эҳтиёжманд жамоаларга» инсонпарварлик ёрдами етказилиши йўлидаги тўсиқларни олиб ташлашга, шунингдек, Ракхайн штатидан қочган роҳинжаларнинг ортга қайтиши учун шароит яратиб беришга чақирган эди. Бундан ташқари, АҚШ роҳинжа халқи дискриминация қилинишининг туб сабабларига барҳам беришни талаб этди.
Конгресс томонидан 2015 йилда қабул қилинган «Бутунжаҳон Магнитский қонуни» АҚШ ҳукуматига хорижлик шахсларга нисбатан инсон ҳуқуқларини бузгани учун санкциялар қўллаш ҳуқуқини беради. Бу қонун 2012 йилда қабул қилинган «Магнитский қонуни»нинг давоми бўлиб, унда Россия Федерациясида инсон ҳуқуқларининг бузилишига масъул бўлган шахсларга нисбатан шахсий чекловлар қўллаш назарда тутилган эди.