Иордания, Туркия ва Индонезияда АҚШ элчихонаси Қуддусга кўчирилишига қарши намойишлар ўтказилди
11 май куни Иорданияда АҚШ элчихонасининг Қуддус шаҳрига кўчирилишига қарши намойиш бўлиб ўтди. Presstv.com нашрига кўра, Иордан водийсида уюштирилган норозилик акциясида 7000 мусулмон қатнашган.
Туркиянинг Истанбул шаҳрида ҳам Туркия ва Фаластин байроқларини кўтариб чиққан бир неча минг мусулмон АҚШ элчихонасининг Қуддус шаҳрига кўчирилишига кескин норозилик билдирган.
Намойиш қатнашчилари: “Фаластин фаластинликларники. Қуддус мусулмонларники!”, деган шиорларни кўтариб чиққан.
Индонезияда минглаб мусулмон АҚШ Президенти Доналд Трамп Қуддус шаҳрини Исроил давлатининг пойтахти деб тан олганига қарши норозилик намойиши ўтказди.
АҚШ Исроилдаги ўз элчихонасини келаси ҳафтада Тел Авивдан Қуддус шаҳрига кўчиришни режалаган.
Jewishnews.timesofisrael.com нашри хабарига кўра, 11 май куни пойтахт Жакартадаги норозилик намойишида Индонезия ва Фаластин байроқларини кўтариб 5000 нафар мусулмон иштирок этган.
Намойишда сўзга чиққанлар: ”Биз, мусулмонлар, фаластинликларга зулм ўтказилишига ва уларга нисбатан босқинчиликнинг ҳар қандай кўринишига қаршимиз. Аллоҳу акбар”, дея такбир келтирган.
Индонезия Президенти Жоко (Жокови) Видодо Афғонистон, Индонезия ва Покистон уламолари ўртасида жума куни уч томонлама учрашув бошланиши олдидан қилган чиқишида Индонезия “Трампнинг қарорини кескин қоралаши”ни алоҳида таъкидлаган.