Расмий Киев Украина шарқидаги «кўнгиллилар»га нисбатан ультиматум эълон қилди
Украина ҳукумати мамлакат шарқидаги «кўнгиллилар»га (Ғарб матбуот уларни «исёнчилар», Украина ҳукумати эса «террорчилар» деб атамоқда) нисбатан ультиматум эълон қилди. Бу ҳақда «УНИАН» хабар бермоқда.
Аксилтеррор операцияси (АТО) спикери Владислав Селезнёвнинг сўзларига кўра, агар ўзини ўзи мустақил деб эълон қилган «Донецк» ва «Луганск халқ республикалари» вакиллари таслим бўлишмаса, улар томонидан Донецкда эгаллаб олинган объектларга «юқори аниқликдаги махсус қурол» ёрдамида зарба берилади.
Селезнёвнинг эслатишича, «кўнгиллилар» Донецк аэропортига ҳужум қилганларидан сўнг, АТО раҳбарияти улардан капитуляция эълон қилишни талаб этганди: кимда ким ўз хоҳиши билан қуролини ташласа, уларнинг хавфсизлиги кафолатланганди. «Халқ республикалари» тарафдорлари ҳукумат талабларини қабул қилмаганларидан сўнг, куч ишлатиш тизими вакиллари авиациядан фойдаланган ҳолда «террорчиларни йўқ қилишни бошлашган».
Спикернинг қайд этишича, Украина куч ишлатиш тизимлари тинч аҳоли вакилларига қарши жанг қилмаяпти ва фуқаролар орасида қурбонлар юз беришига йўл қўймайди. Шу муносабат билан, у Донецкда Украина армияси қуроли кучи билан тинч аҳоли вакиллари ҳалок бўлгани ҳақидаги хабарларни рад этди.
Айни вақтда, Донецк мэри Александр Лукьянченко махсус ташкил этилган матбуот анжумани вақтида, томонлар жанг майдонидан ҳалок бўлганларнинг жасадларини олиб чиқиб кетиш учун вақтинча сулҳ тузишганини маълум қилди. «Тинчлик ҳақида ҳеч ким келишмоқчи эмас», – дея қайд этди Лукьянченко.
Апрель ойидан бери Украинанинг Донецк вилоятида АТО режими жорий этилган. Куч ишлатиш операцияси бир неча бор – охирги марта Украинадаги муддатидан аввалги президентлик сайловлари сабаб вақтинча тўхтатилди. Сайлов натижалари эълон қилинганидан сўнг, Украина бош вазири Виталий Ярема мамлакат шарқидаги куч ишлатиш операциясининг фаол даври «Украина ҳудудида бирорта ҳам террорчи қолмагунича давом этиши»ни маълум қилди (Украина ҳукумати «Донецк» («ДХР») ва «Луганск халқ республикалари» («ЛХР») ҳамда уларнинг тарафдорларини террорчилар деб ҳисобламоқда).
Донецк мэри Александр Лукьянченконинг маълум қилишича, шаҳардаги сўнгги тўқнашувлар натижасида 40 киши ҳалок бўлган, улардан икки нафари тинч аҳоли вакилидир, қолган 38 нафари эса жанговар ҳаракатлар иштирокчилари. Бундан ташқари, 31 нафар жабрланувчи шифохонага ётқизилган, улардан тўрт нафари тинч аҳоли вакили. Қурбонлар ва жабрланувчилар қайси томон вакиллари эканлигига мэр аниқлик киритмаган.
«ДХР» вакилларининг маълумотларига кўра, Донецкдаги сўнгги тўқнашувлар натижасида 100га яқин киши ҳалок бўлган, уларнинг 50дан ортиғини «кўнгиллилар» ташкил қилади. Ўз навбатида, АТО матбуот хизмати тахминан 200 нафар «террорчи» йўқ қилингани ҳақида ахборот берган.