Трамп ўз тарафдорларини мусулмонларга ташланишни бас қилишга чақирди

АҚШнинг янги сайланган президенти Дональд Трамп америка телеканалларидан бирида ўз тарафдорларини мусулмонларга ҳадеб ташланаверишни бас қилишга чақирди.

Ўтган йил давомида АҚШда исламофобия даражаси 60 фоиздан кўпроқ кўтарилиб, 2001 йил 11 сентябрдаги ҳолатга келиб қолган.

CBS телеканали бошловчисининг мусулмонларни чиқиштиришмаяпти деган луқмасига жавобан Трамп шундай деди:

«Буни эшитиш мен учун қайғули. Мен «Буни бас қилинглар» дейман. Агар бу нарса ёрдам берса, мен шундай дейман ва буни тўппа-тўғри камерага қараб айтаман – Бас қилинглар!»

Эслатиб ўтамиз, Дональд Трампнинг муҳожирларни камситиш оҳангидаги сўзларига энг ашаддий қарши чиққан одам АҚШ Демократик партияси праймеризининг собиқ қатнашчиси, Вермонт штатидан сенатор қилиб сайланган Берни Сандерс эди. У ўз чиқишларининг бирида шундай деган эди: «Бу ер Америка. Биз ҳеч кимни ҳайдаб чиқармоқчи ҳам эмасмиз, дунёдаги энг катта динлардан бирига қарши чиқмоқчи ҳам эмасмиз. Мен ўзи туғилиб ўсган Ватанида елкасини қисиб, доимо хавотир остида яшайдиган мусулмон болаларни кўришни истамайман».

Айтиб ўтиш жоизки, ўтган йилнинг бошида республикачилар вакилининг Жанубий Каролинадаги Рок Хилл шаҳрида бўлиб ўтган сайловолди митингидан мусулмонлар ҳайдаб юборилган эди.