Масжид йўлагидаги илиқ сўзлар
- Written by Administrator
Сан-Бернардино шаҳридаги терактдан сўнг бир йил ўтгач, ўша терактда отаси ўлдирилган Кейт Боуман хоним юртдошларини мусулмонларга нисбатан холис бўлишга чақирмоқда, деб хабар беради The Guardian. Унинг отаси Гарри Боуман соғлиқ сақлаш органлари вилоят инспекторлари билан тушлик қилиб ўтирган жойида эр-хотин террочилар томонидан отиб ташланган эди.
Насроний динининг лютеран мазҳабига мансуб бўлган 15 ёшли бу қиз онаси билан бирга маҳаллий мусулмонларни қўллаб-қувватлаш мақсадида махсус тадбир ўтказди. У шаҳардаги масжид олдидан ўтган йўлакка рангли бўр билан мусулмонлар шаънига илиқ сўзлар ёзиб қолдирди.
«Терактдан кейин интернетда мусулмонларга нисбатан нафратга тўлиб-тошган изоҳларнинг кўплигидан жаҳлим чиқиб кетди, – дейди Боуман. – Мен тушунмай қолдим, қандай қилиб одам бир дин ҳақида шунчалик жоҳил бўлиши ва барча мусулмонларни бирданига айблаши мумкин?»
Боуманлар оиласи Сан-Бернардиновдаги фожиадан кейин кучайиб кетган исламофобияга қарши норозилик билдирган ягона оила эмас. Динлараро мулоқотга оид тадбирларда ушбу терактда қурбон бўлган яна кўпчилик кишиларнинг оилалари ҳам иштирок этишди.
Кейт Боуманнинг айтишича, у сўнгги пайтда исламофобик кайфиятлар янада оммалашаётгани кўриб, бунга чидаб тура олмаган ва онаси билан бирга мазкур тадбирни қилишга қарор қилган.