Собиқ вазир Ҳажни танқид қилгани учун ҳибсга олинди
Хабар қилинишича, Бангладешдаги нуфузли шахслардан бири, мазкур мамлакатнинг телекоммуникациялар бўйича собиқ вазири Абдул Латиф Сиддиқ муқаддас Ҳаж амалини танқид қилгани учун куни кеча ҳибсга олинган. Унинг танқиди Бангладеш бўйлаб норозиликларга сабаб бўлган ва омма унинг суд қилинишини талаб этган.
Дакка шаҳар полициясининг матбуот котиби Масудур Раҳмон собиқ вазир полиция томонидан ҳибсга олингани ва судга етказилганини маълум қилган.
Эслатиб ўтамиз, ўзи ҳам 1998 йилда Ҳаж амалини бажарганлиги айтилаётган Абдул Латиф Сиддиқ шу йил сентябрь ойида АҚШнинг Нью-Йорк шаҳрида бўлиб ўтган бир йиғин доирасида чиқиш қилиб: “Мен Ҳаж учун ўлганман... Икки миллион киши Саудия Арабистонига Ҳаж зиёратига борибдилар. Ҳаж инсон кучининг бекорга сарф бўлишидир. Ҳаж амалини бажараётганларда ҳеч қандай маҳсулдорлик йўқ... Улар иқтисодиётни камайтирадилар, хорижда жуда кўп пул сарфлайдилар”, – деганди. Кейинроқ у ўз сўзлари учун узр сўрашдан ҳам бош тортганди.
Айрим гуруҳлар Абдул Латиф Сиддиқнинг қатл этилишини талаб қилаётганликлари ҳам хабар қилинмоқда.