Бугун Парижда “Шарли Эбдо” журналининг барча муаллифлари ўлдирилди
Сатирик ҳафталик журналининг таҳририятига бугун ҳужум уюштирилди. Афтидан ҳужум исломчилар томонидан амалга оширилган. Шарли Эбдо таҳририятига уюштирилган ҳужум жуда пухта режалаштирилганга ўхшайди. Нашрнинг ходимлари ва биринчи навбатда рассомлар ҳафтанинг қолган кунлари уйларида ишлайдилар. Бугун эса улар таҳририят мажлисига йиғилганлар ва ходимларнинг деярли ҳаммаси ўз жойида бўлишган, деди бугун ишга кела олмаган нашрнинг ходимаси Монд журналининг мухбирига.
Калашников автоматлари билан қуролланган террорчилар маҳаллий вақт билан соат 11:30 да таҳририятга ёпирилиб кирдилар. Тирик қолган гувоҳларнинг айтишича, ҳужум қилганлар рассомларни номма-ном чақириб отишган. Террорчилар ўзларини “Ал-Қоида” гуруҳининг аъзоларимиз, деб ўқ ота бошладилар. Кейинроқ маълум бўлишича, ҳалок бўлганларнинг орасида нашрнинг энг танилган карикатурачилари: Шарб, Кабю, Тиню ва Волински бор эди. Шундан сўнг ҳужум қилганлар пайғамбар учун ўч олиб бўлганларини билдирдилар ва бинони тарк этдилар. Кўчага чиққанида эса улар воқеа жойига етиб келган полициячиларга дуч келдилар ва уларга қарата ўқ уза бошладилар. Полициячилардан бири яраланди, террорчилардан бири унинг ёнига югуриб келиб бошига ўқ узиб ўлдирди. Буни томга беркиниб олган баъзи журналистлар видеотасвирга олдилар. Ўша ердан туриб ниқоб кийган одамларнинг ўқ узишдан аввал “Аллоҳу Акбар!” дея қичқираётганлари яхши эшитилди.
Полициячиларни бир ёқли қилиб, ҳужумчилар қора автомашинага ўтирдилар ва Парижнинг шимолий тарафига қараб жўнаб кетдилар. Улар ҳеч қанақа қийинчиликларсиз шаҳарнинг ярмидан ўтиб олдилар. Шундан кейин улар Париж четидаги Пантену деган жойига кираверишда машиналарини ташлаб номаълум йўналишда ғойиб бўлдилар. Кўпчилик гувоҳлар террорчилар икки киши бўлган дейишмоқда. Бироқ Франция ИИВ раҳбари Бернар Казнёв билдиришича, жиноятчилар уч киши бўлган. Британиянинг Гардиан нашри манбалари эса ҳужум қилганларнинг сони тўртта эди, дея таъкидлашмоқда. Парижда ва шаҳар атрофида энг юқори террорчилик таҳдиди эълон қилинди, уч мингдан зиёд полициячилар одамлар кўп тўпланадиган жойларда патруллик қилишга бошлади. Бундан ташқари, Мишель Уэлбекнинг мамлакат исломлашув таҳдиди остида қолаётгани ҳақида ҳикоя қилувчи янги романини айнан шу бугун нашрдан чиқарувчи Фламмарион нашриётини ҳам қўриқ остига олиш тўғрисида қарор қабул қилинди.
Франция президенти Франсуа Олланд жиноятчилар албатта қўлга олинади, деб ваъда қилмоқда.
Россиядаги “Дин ва жамият” (“Религия и общество”) таҳлилий марказининг раҳбари Алексей Гришин француз газетасидаги карикатуралар теракт учун бир баҳона бўлиши мумкин, холос деб ҳисобламоқда.
Экспертнинг фикрича, террорчилар ўз ҳаракатлари билан Европа давлатиниг заифлигини кўрсатмоқчи бўлишган.
Бугун Парижда ўлдирилганлар орасида “Шарли Эбдо” журналининг бош муҳаррири Стефан Шербанье ҳам бор. Икки йил аввал пайғамбар Муҳаммад карикатуралари сабабли катта жанжал кўтарилганида, у “Ал-Жазира” телеканалига берган интервьюда расмлар ҳеч кимга оғир ботмаслиги керак, деб гапирган эди.
“Шарли Эбдо” журнали, шунингдек, россиялик сиёсий ва дин арбобларининг ҳам карикатураларини чизиб келган, уларнинг орасида патриарх Кирилл ва президент Путин ҳам бор.
Россия Журналистлар кенгашининг раиси Всеволод Богдановга кўра, Парижда бугун амалга оширилган теракт ўзга маданият вакилларига нисбатан тоқатсизликнинг аломатидир.
Терроризмга қарши фақат биргаликда кураш олиб бориш мумкин, - дейишади Россия раҳбарлари. Парижда содир бўлган воқеалар бўйича Кремлнинг позициясини президентнинг матбуот котиб Дмитрий Песков сўзлаб берди.
Европа мамлакатларининг кўпи журналистларга қарши оширилган суиқасдни қоралаб чиқдилар. Мисол учун, Британия бош вазири Дэвид Кэмерон парламентда сўзга чиқа туриб, содир бўлган ҳодисани сўз эркинлигига ҳужум деб атади.
Париждаги терорчилар ҳаракатларини кўплаб халқаро тузилмалар, шу жумладан, ЕИ, НАТО ва ЮНЕСКО қоралаб чиқдилар.
Манба: "Радио Эхо Москвы"
Аббос Асад таржимаси