Туркманистонда спиртли ичимликлар тақиқлаб қўйилди
Туркманистон келгуси ойда мамлакатда ўтадиган муҳим спорт анжуманида «жамоатчилик тартибини» таъминлаш учун октябрь ойигача спиртли ичимликлар сотувини тақиқлаб қўйди.
Бу ҳақда Савдо вазирлиги ходими шанба куни маълум қилди, дея хабар беради Франс-Прес янгиликлар агентлиги.
Тақиқ Ашхободда сентябрнинг иккинчи ярмида Осиё ўйинларининг ўтказилиши муносабати билан киритилган; бу ҳақда исми ошкор этилмаслик шарти билан вазирлик ходими айтиб берди.
«Тақиқдан асосий мақсад – мамлакатда ҳуқуқни муҳофаза қилиш органлари томонидан 17 августдан бошлаб жорий этилган хавфсизлик чоралари билан боғлиқ тинчлик ва жамоатчилик тартибини таъминлаш», - дея қўшиб қўйди манба.
Франс-Пресс мухбири Ашхабоддаги қатор спиртли ичимликлар сотишга ихтисослашган дўконлар ёнидан ўтиб, уларнинг ҳаммаси ёпиб қўйилганига амин бўлди.
Расмий Ашхабод 2010 йил 19 декабрда мазкур ўйинларни ўтказиш ҳуқуқини қўлга киритган бўлиб, ушбу қарор Қувайт пойтахтида эълон қилинган ҳамда Осиё Олимпиада Кенгаши ва Туркманистон Миллий олимпиада қўмитаси ўртасида иккитомонлама ҳужжат имзоланган. Осиё ўйинлари мамлакат пойтахтида 17-27 сентябрь кунлари ўтади.
Мадина Муҳаммад таржимаси