Эрдўғоннинг огоҳлантиришидан сўнг Мьянма Араканга турк инсонпарварлик ёрдамини киритишга рози бўлди
Туркия Ракхайн штатидаги мусулмон роҳинжаларга боғлиқ инқироз муносабати билан Мьянмага инсонпарварлик ёрдами етказиб берган биринчи мамлакат бўлади, деди сешанба куни президент Ражаб Тоййиб Эрдўғоннинг матбуот котиби Иброҳим Калин, дея хабар беради РИА Новостига таяниб Yenicag.Ru.
Роҳинжа жангарилари 25 август куни Мьянманинг Ракхайн штатида бир вақтнинг ўзида бир нечта полиция постларига ва армия казармаларига ҳужум қилдилар. Хавфсизлик кучлари ҳамда жангарилар ўртасидаги жанглар ҳамон давом этмоқда. Энг шиддатли жанглар бўлган кунлар, яъни 25–27 августда тўқнашувлар натижасида 100 га яқин инсон ҳалок бўлди, улар орасида ўндан ортиқ полициячи ва ҳарбийлар бор эди.
Аввалроқ Эрдўғон Мьянмадаги ҳодисаларни «мусулмонлар генициди» деб баҳолаган ва бу масалани 19 сентябрда БМТ бош ассамблеяси мажлисида кўтариш ниятини айтган эди.
«Бугун президентимиз Мьянма раҳбари билан телефон музокараси ўтказгандан сўнг хорижий инсонпарварлик ташкилотлари орасида биринчи бўлиб Турк ҳамкорлик ва кооперация агентлигига Мьянмага кириш ва биринчи босқичда бир тонна инсонпарварлик ёрдами кўрсатиш учун рухсат берилди», – деган Калин.
Унинг сўзларига кўра, инсонпарварлик ёрдами озиқ-овқат масулотлари ҳамда кийим-кечакдан иборат.
Роҳинжа – XIX аср охири — XX асрда Британия мустамлакачи ҳукумати томонидан Араканга кўчирилган этник бенгалиялик мусулмонлардир. Айни кунларда бир ярим миллиондан ортиқ роҳинжалар Ракхайн штатида аҳолининг кўп қисмини ташкил этадилар, бироқ улардан жуда озчилиги Мьянма фуқаролигига эга.
Расмий ҳукумат ва буддист аҳоли роҳинжаларни Бангладешдан келган ноқонуний мигрантлар деб ҳисоблайдилар. Роҳинжалар ва «асл араканликлар», яъни буддистлар ўртасидаги зиддиятларнинг илдизи жуда чуқур ва узоқларга бориб тақалади, бироқ унинг қуролли тўқнашувларга ва инсоний инқирозга айланиб кетиши Мьянма ҳукуматининг 2011–2012 йилларда ҳарбийлардан фуқароларга ўтиши ортидан бошланди.