Борис Жонсоннинг «Ливиядаги мурдалар» деган сўзи жанжалга сабаб бўлди
Лондон шаҳрининг собиқ мэри, Буюк Британия ташқи ишлар вазири Борис Жонсон Ливия ҳақида ножўя ҳазил қилиб, боши жанжалдан чиқмай қолди.
Консерваторлар партиясининг Манчестердаги йиғинида нутқ сўзлар экан, у Ливиянинг «оппоқ қум» ва «ажойиб денгиз»ларга эга салоҳиятини мақтади. Лекин у шу билан чекланиб қолмай, Ливияда туризмни ривожлантириш учун сармоя тикишга тайёр британиялик тадбиркорлар борлигини айтиб ўтди. «У ердаги Сирт шаҳри янги Дубайга айланади. Фақат у ердан мурдаларни йиғиштириб олиш керак», – деди Жонсон. Ўша ерда ҳозир бўлганлар бу ҳазилни қаттиқ кулги билан қарши олишди, лекин кейин Жонсоннинг устига танқидлар ёғилди. Британия ташқи ишлар вазирининг партиядаги сафдоши депутат Хайди Аллен хоним эса ҳатто Жонсоннинг ишдан бўшатилишини талаб қилди. «Бундай дейишга ҳеч кимнинг ҳаққи йўқ, айниқса ташқи ишлар вазирининг. Бунинг учун Борисни бўшатиб юбориш керак. У менинг партиям вакили эмас», – деб ёзди у.