Сочида Сурия бўйича жиддий келишувга эришилди
Президент Ражаб Тойиб Эрдўғон Сочида бўлиб ўтган Россия ва Эрон президентлари билан учрашувнинг натижаларини шарҳлади.
Россия, Туркия ва Эрон президентларининг Сочидаги учрашувида Суриядаги инсоний фоижиларга чек қўйиш бўйича том маънода жиддий келишувга эришилди, деди Туркия президенти Ражаб Тойиб Эрдўғон.
«Умид қиламанки, ушбу қарорнинг натижалари жойларда энг қисқа муддатда намоён бўла бошлайди», – деди Туркия раҳбари ва бутун дунё ушбу уч томонлама учрашувни Суриядаги тинчлик ва барқарорлик учун умид манбаи дея қабул қилганини таъкидлади.
Туркия раҳбарининг сўзларига кўра, Сочи музокараларига суриялик қочқинлар ҳам катта умид боғлаганлар ва президентлар учрашувини ўз уйларига қайтиш учун ишора сифатида қабул қилганлар.
Эрдўғон Туркия, Эрон ва Россия вакиллари энди мунтазам ҳар 15 кунда ё ойда бир учрашиб туришларини ҳам тасдиқлади.