Дубай ҳукумати қоғоздан умуман воз кечади
Дубай ҳукумати 2021 йилга келиб қоғозлардаги ҳужжатлардан умуман воз кечмоқчи. Бу ҳақида Дубай шаҳзодаси шайх Ҳамдан ибн Муҳаммад ибн Рашид ал-Мақдум маълум қилган.
«2021 йилдан кейин Дубай ҳукуматининг бирон ходими ёки буюртмачиларнинг ҳеч бир ҳужжатни принтердан чиқаришларига эҳтиёж қолмайди. Бу бугун Дубай ҳукумати ишлатаётган миллиард вароқ қоғозларнинг иқтисод этиб қолинишига ёрдам беради. Алалоқибат, мазкур ташаббус инсонларни бахтлироқ қилади ва келажакда шаҳарнинг бошқа турли эҳтиёжларини қондириш имконини беради», деди шаҳзода. Унинг бу сўзларини «Русские Эмираты» ресурси иқтибос қилиб келтирмоқда.
Эслатиб ўтамиз, аввалроқ Дубай ҳукумати уни дунёдаги энг илғор шаҳарга айлантириш нияти борлигини айтган эди.