БМТ Суриядаги жанговар ҳаракатларни тўхтатишга чақирди

БМТнинг Инсонпарварлик масалаларини мувофиқлаштириш бошқамаси матбуот котиби Йенс Леркенинг журналистларга маълум қилишича, Шарқий Гута, Идлиб, Фуа ва Кайройдаги тинч аҳолига инсонпарварлик ёрдамини етказиб бериш учун жанг ҳаракатларини камида бир ойга тўхатиб туриш керак.
Унинг сўзларига кўра, Раққа ИШИД террорчиларидан тозалангач, ўз уйларига қайтган тинч аҳоли бомбалар остида ҳалок бўлмоқда. Бундан ташқари, Идлибда давом этаётган ҳарбий амалиётлар тинч аҳоли ўртасида қурбонлар сони ортишига сабаб бўлмоқда, деди матбуот-котиб.
Леркенинг «Анадолу» агентлигига маълум қилишича, БМТнинг Сурияда вақтинча жанговар ҳаракатларни тўхтатиб туришга чақируви Туркия ҳарбий кучларининг Африндаги амалиётларига тааллуқли эмас.
Ўз навбатида, ЮНИСЕФнинг Суриядаги вакили Фрэн Эквизанинг сўзларига кўра, Башад Асад режими томонидан қамал қилиб турилган Шарқий Гутада яшовчи 120 болани зудлик билан эвакуация қилиш керак.
Шу йилнинг январ ойида Сурияда тўрт шифохонага ҳужум қилинган, йил бошидан бери эса 60 га яқин бола ҳалок бўлган, деди Эквиза.
Дамашқ яқинидаги Шарқий Гута шаҳрида 400 мингга яқин аҳоли бешинчи йилдирки қамал шароитида яшаб келмоқда. Сўнгги саккиз ой давомида Шарқий Гутадаги гуманитар вазият кескин ёмонлашган.