Ҳиндистонда ватандошларини фоҳишага айлантирган ўзбекистонлик қўшмачи ҳибсга олинди
Деҳли жануби-шарқида ўз ватандошларини фоҳишабозлик билан шуғулланишга мажбур қилган ўзбекистонлик аёл ҳибсга олинди. Бу ҳақда, Times of Indiа газетасига асосланиб, CA-News хабар бермоқда.
Исми Дилсух эканлигини маълум қилинган аёл бошқа икки нафар ўзбекистонлик аёлни ўз танаси билан савдо қилишга мажбурлагани учун қўлга олинган. Бу аёл полиция томонидан биринчи марта 2011 йилда ҳибсга олинган эди – ўшанда полиция МДҲ мамлакатларидан келган беш нафар шахсни бошқаларни ўз танаси билан савдо қилишга мажбурлагани учун ҳибсга олган эди.
«Ўша вақтларда бу аёл қўнғироқ бўйича чақириладиган қиз вазифасида ишлаган. Ўшанда у жазодан қутулиб қолган эди, ҳозирда эса қўшмачи сифатида ишлаб келган», – деди полиция катта офицери.
Дилсухни икки нафар аёл 16 июнь куни кечаси қочиб, Сафдаржунг госпиталига етиб келганидан сўнг фош этган. Аёлларнинг шифокорларга берган маълумотларига кўра, уларни ушлаб олиб, бир неча бор зўрлашган. Улар ҳар сафар қаршилик кўрсатмоқчи бўлишганида, аёлларни дўппослашган.
Лашбат Нагар полицияси гуруҳ бўлиб зўрлаш, таҳдид қилиш ва одам савдоси моддалари бўйича иш қўзғаган. «Дастлабки тергов-суриштирув ишларидан сўнг аёлларнинг паспортлари олиб қўйилгани, мижозлардан олинган пуллар эса бу қизларга берилмагани маълум бўлди», – деди полиция вакили.
Ҳар иккала аёл ҳам Ҳиндистонга сайёҳлик визаси билан келиб, январь ойида Аграда Дилсух учрашган. Дилсух улардан Деҳлига келганда у билан учрашишни сўраган. Терговчининг сўзларига кўра, аёллар «Пахарганж» меҳмонхонасига жойлашишган ва кейинчалик ўз танаси билан савдо қилишга мажбур қилинган.
«Биз ушбу масала бўйича Ўзбекстон элчихонаси билан алоқада бўлиб турибмиз. Қизлар сешанба куни суҳбатдан ўтишди», – дейди терговчи Шарма Гаурав.
Қайд этиш жоиз, 2012 йилнинг октябрида ҳам фоҳишаликда айбланиб, уч нафар ўзбекистонлик аёл ҳибсга олингани ҳақида хабар берилган эди.