Рамазон ҳайитини нишонлаш тўғрисида Ўзбекистон Республикаси Президентининг Қарори
Муборак Рамазон ҳайитининг халқимиз маънавий ҳаётидаги ўрни ва аҳамиятини эътиборга олиб, миллий-диний қадриятларимизни сақлаш ва улуғлаш ҳамда Ўзбекистон Республикаси Президентининг “Рўза ҳайитини дам олиш куни деб эълон қилиш тўғрисида”ги 1992 йил 27 мартдаги ПФ-368-сон фармонига мувофиқ:
1. Ўзбекистон мусулмонлари идорасининг 2013 йилда Рамазон ҳайитининг биринчи куни 9 август жума кунига тўғри келиши ҳақида қабул қилган қарорини инобатга олиб, 2013 йил 9 август дам олиш куни деб белгилансин ва мамлакатимизда байрам сифатида кенг нишонлансин.
2. Республика “Нуроний”, “Маҳалла” жамғармалари, “Камолот” ёшлар ижтимоий ҳаракати ва бошқа барча мутасадди идора, жамоат ташкилотлари Рамазон ҳайитининг жойларда тартибли ва юқори даражада, халқимизнинг миллий қадриятларига мос равишда ўтиши учун тегишли тадбирларни амалга оширсин.
3. Ўзбекистон Миллий телерадиокомпанияси, Ўзбекистон Миллий ахборот агентлиги ва бошқа оммавий ахборот воситаларига Рамазон ҳайитини нишонлаш билан боғлиқ тадбирларни кенг ёритиш тавсия этилсин.
Ўзбекистон Республикаси
Президенти И.Каримов
* * *
Диний идора матбуот хизмати тарқатган хабарга кўра, Ўзбекистон мусулмонлари идораси Уламолар ҳайъати 2013 йилда Рамазон ҳайитининг биринчи куни шу йил 9 август жума кунига тўғри келиши ҳақида қарор қабул қилди.
Рамазон ҳайити намози Тошкент шаҳридаги жоме масжидларда 2013 йил 9 август куни эрталабки соат 06:00 да адо этилади. Қолган ҳудудларда орадаги вақт тафовутига мос шаклда ўқилади.