Яман пойтахтида нотинчилик
Ямандаги “Ҳоутий” ҳаракатининг минглаб тарафдорлари пойтахт Сано кўчаларига чиқиб, норозилик намойишларини ўтказмоқдалар.
Намойишчиларнинг айтишича, улар мамлакатдаги коррупция ва ёнилғи учун белгиланган “ҳаддан ташқари” юқори нарҳларга қарши чиқмоқдалар.
Ҳаракат раҳбари Абдулмалик ал-Ҳоутий шу йил 17 август куни телеэфир орқали нутқ сўзлаб, унда ўз тарафдорларини Сано ва бошқа йирик шаҳарларнинг кўчаларига норозилик намойиши учун чиқишга ундаган.
Абдулмалик ал-Ҳоутий мамлакат президенти Абд-Раббу Мансур Ҳодийдан амалдаги ҳукуматни тарқатиб юборишни, ёнилғи нарҳларини пасайтиришни талаб қилиб, келгуси жума кунига қадар муҳлат белгилаган.
Шу ўринда айтиб ўтамиз, “Ҳоутий” Яманда диний ва ижтимоий ҳаракат ҳисобланиб, “Ансораллоҳ” номи билан ҳам танилган. Ҳаракатнинг ўз “қуролли қаноти” мавжуд.