БМТ Хавфсизлик кенгаши Ироқдаги жангариларга қарши санкциялар киритади
БМТ Хавфсизлик кенгаши Ироқ ва Сурияда фаолият олиб бораётган ташкилотлар — «Ислом давлати» ва «Жавҳат ан-Нусра» билан боғлиқ олти кишига қарши санкция киритиш ҳақида резолюция қабул қилди. Бу ҳақда Euronews хабар берди.
Таъкидланишича, бу шахслар гуруҳлар фаолиятини молиялаштириш, режалаштириш ва ёрдам билан таъминлашда қатнашади.
Санкциялар активларни музлатиб қўйиш ва чет элга сафарларни чеклашни ўз ичига олади.
Ўз навбатида, Европа ташқи ишлар вазирлари Брюсселдаги учрашувда Ироқ курдларига қурол етказиб беришга асосан розилик билдирди. Уларнинг фикрича, айнан курдларнинг Пешмерг отрядлари исломийларга нисбатан жиддий қаршилик кўрсатмоқда.
Шунингдек, европаликлар Брюсселда ироқликларга ёрдам бериш учун гуманитар ҳаво кўприги ташкил қилишга ҳам келишишди. Бунда гап биринчи навбатда мамлакат шарқидаги тоғли ҳудудларда қамалга тушиб қолган қочқинлар учун парашютда озиқ-овқат етказиб бериш ҳақида бормоқда.