Суриялик қочоқлар сони 3 миллион кишига етти
Бирлашган Миллатлар Ташкилотининг маълум қилишича, Сурияда давом этаётган фуқаролик уруши оқибатида 3 миллиондан ортиқ киши қочоққа айланган ва ўз мамлакатларини тарк этишга мажбур бўлишган.
БМТ Қочоқлар бўйича олий комиссари Антонио Гутеррес бу борада жума куни баёнот бериб, жумладан, шундай деб таъкидлаган: “Суриядаги ҳолат эрамизнинг энг йирик гуманитар инқирозига айланди... 2011 йил март ойида бошланган ва ҳозирга қадар давом этаётган қуролли тўқнашув натижасида, Сурия аҳолисининг деярли ярми ўз уйларини ташлаб қочишга мажбур бўлди... бироқ, афсуски, жаҳон ҳамжамияти ва қўшни мамлакатлар қочоқларнинг эҳтиёжларини қондиришга ожизлик қилмоқдалар... БМТнинг ихтисослаштирилган тузилмаси ўзининг ўтган 64 йиллик тарихида бундай кўламдаги гуманитар инқирозга хали дуч келмаган эди”.
Бундан ташқари, Суриянинг 23 миллионлик аҳолисидан 6,5 миллион киши “ички қочоқлар”га айланган. Улар мамлакат ичида бошпана топиш учун саргардон бўлмоқдалар. Энг ачинарлиси, қочоқлар орасида миллионлаб болалар, хотин-қизлар ва кексалар бор.
Ҳозирги кунда Лубнонда 1,14 миллион, Туркияда 815 минг, Иорданияда 608 минг суриялик қочоқлар рўйхатга олинган. Бундан ташқари, давом этаётган уруш бугунга келиб 191 мингдан ортиқ кишининг ўлимига сабаб бўлди.