Яман президенти ҳукуматни истеъфога чиқарди
Яман президенти Абдуроббуҳ Мансур Ҳодий мамлакатнинг амалдаги ҳукуматини тўлиқ таркибда истеъфога чиқарган. Бу ҳақида “Би-Би-Си” телеканали хабар бермоқда.
Айтилишича, яқин орада президент Мансур Ҳодий ҳукуматнинг янги раҳбарини тайинлаши ва “миллий бирлик маъмурияти”ни тузиши керак. Бундан ташқари, президент ёнилғи субсидияларини ҳам қайта кўриб чиқишини маълум қилган. Бироқ, шунга қарамай, норозилик кайфиятидаги “Ҳоутий” ҳаракати мамлакат президентининг мазкур ташаббусини инкор этган.
Эслатиб ўтамиз, шу йил август ойининг ўрталарида “Ҳоутий” ҳаракатининг етакчиси Абдул Малик ал-Ҳоутий мамлакат президентидан ёнилғи нарҳлари ва субсидияларини қайта кўриб чиқишни ҳамда амалдаги “бузуқ” ҳукуматнинг ўрнига “муносиб вакиллардан иборат” ҳукуматни тузишни талаб қилган эди.
БМТ Хавфсизлик Кенгаши Яман президентининг ташаббусини эътироф этар экан, намойишчиларни Сано кўчаларини бўшатишга чақирган.