Беш ёшли мусулмон бола Microsoft’нинг энг ёш экспертига айланди
Ансар.ру хабар қилишича, беш ёшли мусулмон бола Microsoft’нинг тарихдаги сертификатга эга энг ёш экспертига айланди. У америка корпорациясининг имтиҳонларидан муваффақиятли ўтган. Morocco World News’нинг иқтибос келтиришича, Айян Қурайший: “Мен компас ва телескопларни яхши кўраман, лекин энг кўп яхши кўрганим бу призмалардир. Нурнинг призма орқали камалак рангларининг гаммасида акс этиши мени ҳайратга солади”, – деб айтган.
Келиб чиқиши покистонлик бўлган британиялик кичик ёшли мусулмон бола “соҳа томонидан текширилган ва умумэътироф этилган” имтиҳонни муваффақиятли топширгач, “Microsoft профессионали” сертификатини олган. Унинг IT мутахассиси бўлган отаси таъкидлашича, Айян жуда кичик ёшидаёқ компьютерларга қизиқиш билдира бошлаган. Боланинг отаси: “У менинг ёнимда ўтиришни ва диққат билан кузатишни ёқтирарди”, – деб айтган. Отаси ўғлига компьютер саводхонлигининг асосларини кўрсатишни бошлаган ва тез орада Айяннинг ўзига тегишли “устахонаси” пайдо бўлган. Бола у ерда тизим блоклари, операцион тизимлар ва шунга ўхшаш нарсалар билан ўйнар ва улар устида тажрибалар қиларди.
2004 йилда Арфа Карим Microsoft’нинг сертификатга эга ўша пайтдаги энг ёш мутахассиси бўлганди – буни қарангки, у ҳам покистонлик мусулмон оиладан эди. Бироқ, Билл Гейтс томонидан тўлаб берилган энг зўр даволанишга қарамай, 2012 йилнинг январида Арфа эпилептик хуруж сабабли вафот этган.