Исроил Фаластин вазирини ўлдирди
Хабар қилинишича, чоршанба куни Исроил ҳарбийлари Фаластин давлатининг вазири Зиад Абу Айнни ўлдирганлар. Айтилишича, вазир Абу Айн ўша пайт Ғарбий Соҳилда ўтказилаётган тинч норозилик намойишида иштирок этаётган бўлган. Намойишчилар Исроил томонидан Фаластин ерларининг ноқонуний эгаллаб олинишига қарши эканликларини ифода этиш учун тўпланган эдилар.
Фаластин президенти Маҳмуд Аббос мазкур қотилликни “ёввойилик ҳаракати” деб баҳолаган ва “унга чидаб ҳам, уни қабул қилиб ҳам бўлмайди”, деган. Президент Аббоснинг сўзларига кўра, “ушбу қотиллик Фаластин учун ҳар қандай тарзда жавоб қилишга асос” ҳисобланади.
Исроил томонидан содир этилган қотиллик қатор халқаро ташкилотлар ва бошқа давлат раҳбарларининг кескин танқидига учраган. Жумладан, Европа Иттифоқининг ташқи ишлар етакчиси Федерика Моғерини содир бўлган воқеани “зудлик билан” тергов қилинишини талаб этган. Ислом Ҳамкорлиги Ташкилотининг раҳбари Ийяд Маданий мазкур қотилликни “жирканч жиноят” деб атаган ва уни “Исроил томонидан Фаластин халқига нисбатан давом эттирилаётган қатағон, тажовуз ва терроризмнинг яна бир кўриниши” экани ва айбдорлар халқаро трибунал олдида жавоб беришлари кераклигини таъкидлаган.