Мусулмон бўлмаган аёлларнинг “ҳижобли намойиши”
Хабар қилинишича, ўтган жума куни Янги Зеландиянинг Окленд шаҳрида истиқомат қилувчи мусулмон бўлмаган аёллар оммавий ҳижобли намойишда иштирок этганлар. Яъни, тадбир ғоясига кўра, унда қатнашган номуслима аёллар кун бўйи ҳижоб кийган ҳолда юришган. Айтилишича, бундан кўзланган мақсад – муслималарга бўлган бирдамликни ифода этиш ва уларни яқинда Австралияда бўлиб ўтган нохуш воқеалар сабабли юзага келган исломофобия авжига қарши руҳан қўллаб-қувватлаш экани айтилмоқда.
“Биз Сиднейдаги воқеадан кейин ўзларини заифдек ҳис қилишлари мумкин бўлган аёлларга нисбатан бирдамликни изҳор қилмоқчимиз”, – дейди янги зеландиялик жамоат намояндаси Жон МакДональд, – “Янги Зеландия жамияти жуда ҳам турфа хил ва биз шуни кўрсатмоқчимиз ҳамда тафовут ва тушунмовчиликларсиз биргаликда яшашни билишимизни англатмоқчимиз”.
19 декабрь куни бўлиб ўтган намойиш “Учар рўмоллар” деб номланди ва Окленднинг унда қатнашган хотин-қизлари эрта тонгданоқ шаҳар марказий майдонига тўпланиб, бир-бирларига рўмол ўрашга ёрдамлашганлар.