Давутўғлу ЕИни “ифлос кампания”да айблади
Куни кеча Туркия Бош вазири Аҳмет Давутўғлу Европа Иттифоқини Анқарага нисбатан “ифлос кампания” олиб бораётганликда айблади. Унинг айтишича, яқинда Туркияда амалга оширилган қамоққа олишларни ЕИ президент Режеп Таййип Эрдўған рақибларига қарши қаратилган, деб баёнот берган.
Адолат ва тараққиёт партиясининг Анқара шаҳрида бўлиб ўтган қурултойида чиқиш қиларкан, Давутўғлу ЕИнинг бу борадаги баёноти ҳақида, жумладан, шундай деган: “ЕИ ҳатто байрам куни баёнот берибди.... Ушбу баёнот билан улар бизнинг ҳукуматга нисбатан “ифлос кампания” бошлашди”.
Эслатиб ўтамиз, ўтган ҳафтада ЕИнинг ташқи сиёсат етакчиси Федерика Моғерини ва кенгайиш бўйича комиссари Йоҳаннес Ҳаан Туркия полицияси томонидан бир нечта журналистлар ва ёзувчиларга нисбатан уюштирилган рейдларни “матбуот эркинлигига зид” деб баҳолаб, Туркияни бундай эркинликни ҳурмат қилишга чақирган эди. Уларнинг огоҳлантиришича, “Туркиянинг ЕИга қўшилиш борасидаги ҳаракатларининг самараси ушбу мамлакат томонидан демократик қоидаларнинг ҳурмат қилинишига боғлиқ” экан.
Туркия полицияси яқинда амалга оширилган рейдлар ва қамоққа олишлар ҳозирда АҚШда яшириниб олган Фатҳуллоҳ Гюлен ва унинг издошлари томонидан содир этилган жиноятларга даҳлдор эканини айтган. Демократик мамлакатда эса қонун олдида ҳамма бирдек тенг бўлиши, қонун устуворлиги таъминланиши ва содир этилган қонунбузишлар учун жазо муқаррар бўлмоғи керак.