БМТ Хавфсизлик Кенгаши Фаластин давлатчилигини рад этди
Хабар қилинишича, сешанба куни БМТ Хавфсизлик Кенгаши Фаластин давлатини тан олиш тўғрисидаги қарор лойиҳасини рад этган. Овозда беришда иштирок этган 15 та давлатнинг 8 таси (Россия, Хитой, Франция, Урдун, Чад, Люксембург, Аргентина, Чили) резолюцияни қўллаган, 2 таси (АҚШ, Австралия) қарши овоз берган, 5 таси (Британия, Руанда, Литва, Нигерия, Жанубий Корея) овоз беришдан ўзини тийган.
Айтилишича, “қарши овоз бериш” ва “ўзини тийиш” ҳолатлари бўлмаганида эди, АҚШ ўзининг резолюцияга вето қўйиш, яъни қарор қабул қилинишини бир овоз билан тўхтатиб қўйиш ёҳуд рад этиш ҳуқуқидан фойдалана олмаган бўларди.
Хавфсизлик Кенгаши Урдун ва қатор араб давлатларининг мазкур қарор лойиҳасини овозга қўйишга бўлган ҳаракатлари сабабли йиғилгани хабар қилинмоқда. Резолюция лойиҳасига кўра, Фаластин давлати 1967 йилдаги чегаралари асосида ва Қуддуси Шариф унинг пойтахти сифатида тан олиниши ва 2017 йилга қадар у ерларда Исроил оккупациясининг батамом тугатилиши назарда тутилган эди.
Фаластин маъмуриятининг бу борадаги фикри ҳозирча маълум эмас.