“Европадаги исломофобия нималарга олиб келишини билмаймиз”
Туркия-Ислом иттифоқининг Европа бўлими раҳбари Иҳсан Ўнер Европа мамлакатларининг ҳукуматларини исломофобиянинг ўсишига қарши чора кўришга чақирди. Унинг таъкидлашича, “биз бошланган ушбу жирканч ҳолатни тўхтатишимиз керак, чунки у қачон ва нима билан якунланишини билмаймиз”.
Иҳсан Ўнер яқинда исломофобия руҳида Германияда бўлиб ўтган намойишларга тўхталаркан, уларнинг ташкилотчиси – “Ғарбнинг исломлашувига қарши ватанпарвар европаликлар” (PEGIDA) деб номланувчи тузилманинг ҳаракатларини кескин танқид остига олган. Унинг айтишича, PEGIDA Европада тангликни келтириб чиқармоқда.
Сўзида давом этаркан, Иҳсан Ўнер мулоҳазага чорловчи савол билан мурожаат қилган: “Германияда бошланган ирқчилик (расизм) ва Исломга қаршилик қилиш Европада назорат остидан чиқиб кетдими?”.
Дрезден Техника университетининг сиёсатшунослик бўйича профессори Ҳанс Форландер PEGIDA уюштираётган намойишлар Германиянинг обрўсига путур етказишини таъкидлаган.
2014 йил 22 декабрь куни Германиянинг Дрезден шаҳрида 17 минг кишини жалб қилган намойиш исломофобия руҳида ўтгани қатор оммавий ахборот воситаларида ёритилган эди. Немис сиёсий партиялари ва ҳукумати мазкур раллини қоралаган бўлсалар-да, неофашизмнинг бундай элементларини тўхтатиш учун кечиктириб бўлмас тадбирларни амалга оширишни пайсалга солаётгани ҳам айтилмоқда.