“Charlie Hebdo’га бўлган ҳужум – фильм каби саҳналаштирилган”
Туркия парламентининг аъзоси Али Шаҳин Франциядаги “Charlie Hebdo” журнали таҳририяти биносида бўлиб ўтган отишмаларни “фильм каби саҳналаштирилган”, деб атаган. Бу ҳақида у ўз твиттер-эккаунти орқали маълум қилган. Ўша отишмага оид экани айтилаётган видеотасвирлар ва бошқа ҳолатлар ҳақида сўз юритаркан, депутат бир нечта шубҳали жиҳатларга эътибор қаратишга чақирган.
Али Шаҳин, жумладан, ҳужум содир этилган пайтда Париж кўчасида транспорт қатновининг кам бўлгани, ҳужум қилган шахслар томонидан полиция ходимига ўқталган қуролнинг йўналиши, қоннинг чиқмагани ва, нимагадир, ўқ отилиши биланоқ видеотасвирнинг тўхтагани каби фактларга эътибор қаратишга чақирган.
Эслатиб ўтамиз, шу йил 7 январь куни Францияда чиқадиган “Charlie Hebdo” журнали таҳририятининг биносида содир этилган отишма натижасида журнал ходимларидан бир неча нафари ҳалок бўлгани хабар қилинган. Журнал ўзининг кескин руҳдаги карикатуралари билан турли тоифа кишиларнинг ғашига тегиб келгани ҳам айтилмоқда.