Яҳудийларни қутқариб қолган мусулмонлар
Тарқатилган хабарларга кўра, тез кунларда Австралиянинг Мельбурн шаҳрида Иккинчи жаҳон уруши даврида яҳудийларни фашистлар Германиясининг ёвуз жаллодлари қўлидан сақлаб қолган мусулмонларга бағишланган кўргазма бўлиб ўтади. Кўргазманинг асосий диққати уруш даврида Албанияга қочиб беркинган яҳудийлар ва уларга бошпана берган мусулмон албан халқига бағишланиши айтилмоқда.
“Иккинчи жаҳон уруши давомида Германия томонидан босиб олинган барча мамлакатлар ўз ҳудудларида истиқомат қилиб келган яҳудийларни фашистларнинг қийноқ ва ўлим лагерларига оммавий тарзда юборган бир пайтда”, - дейилади хабарларда, - “Албания ва албан халқи юксак жасорат кўрсатиб, ўз ҳудудига бошпана сўраб қочиб ўтган яҳудийларга ғамхўрлик қилган, уларни Гитлер қотилларидан сақлаб қолган”.
“Australian Daily News” ахборот агентлигига интервью бераркан, уруш даврида бир гуруҳ яҳудийларга ўз уйида пошпана берган кишининг Али Шеқер исмли зурриёти шундай сўзларни айтган: “Отам ўзининг ва бутун қишлоқдошларининг ҳаётини хатарга қўйиб, ўша нотаниш кимсаларга нима сабабли бошпана берган, деб ўйлайсиз? Менинг отам ҳақиқий мусулмон эди. У шунинг учун шундай қилган”.