Индонезия яна 25 та давлат учун виза режимини бекор қилмоқчи
Хабар қилинишича, Индонезия ҳукумати мамлакатда сайёҳликни янада ривожлантириш мақсадида яна 25 та давлат фуқаролари учун виза режимини бекор қилмоқчи. Натижада, мазкур давлатларнинг фуқаролари Индонезияга кириш визаларини олмай, бемалол ташриф буюришлари мумкин бўлади.
Мамлакат сайёҳлик ишлари вазири Ориф Яҳёнинг аниқлик киритишича, рўйхатга киритилиши режалаштирилган давлатларнинг 4 таси Хитой, Жанубий Корея, Россия ва Япониядир, қолган 21 тасининг номи тез орада маълум қилинади.
Изоҳ берилишича, Индонезия ҳукуматининг бу борадаги сиёсати мамлакатга келаётган туристлар оқимини кескин оширишга қаратилган бўлиб, бунинг натижасида 2015 йилнинг ўзидаёқ Индонезия оролларига 10 миллиондан ортиқ сайёҳларни жалб қилиш кутилмоқда, 2019 йилга келиб ушбу кўрсаткични 20 миллион нафарга етказиш мақсад қилинган.
Эслатиб ўтамиз, ҳозирда Индонезияда 21 та давлат фуқаролари учун виза режими бекор қилинган. Ўтган 2014 йилда ушбу мамлакатга 9,4 миллиондан ортиқ хорижлик сайёҳ ташриф буюрган, 2013 йилда мазкур кўрсаткич 8,8 миллионтани ташкил этган эди.