Қадимий викинг қабридан Аллоҳ номи битилган узук топилди
Британияда чиқадиган “Daily Mail” нашри “Science News” журналига таяниб хабар қилишича, Швециянинг Стокҳолм университети тадқиқотчилари археологик қазишмалар чоғида “Аллоҳ учун” ёзуви битилган узук топиб олганлар. Топилма викингларнинг қадимий савдо маркази ҳисобланадиган Бирка шаҳри ҳудудида қайд этилган бўлиб, у милодий 9-асрга мансуб дейилмоқда.
Олимларнинг айтишича, салкам 12 аср аввал тайёрланган артефакт ўша даврларда викинглар ва мусулмон ўлкалари ўртасида алоқалар бўлганини исботлайди.
Таҳлилларга кўра, узукни жуда кам тақишган, унинг ички томонида заргар томонидан қопланган кумуш қолдиқлари сақланиб қолган. Бу унинг янги ҳолатда сотиб олинганидан ва Скандинавиягача тақилмаган ҳолатда етиб келганидан далолат беради. Ишлов берилган кумуш олий тоифага мансуб экани ҳам эътироф этилган.
Барчамиз яхши билганимиздек, илк ўрта асрлардаёқ мусулмон савдогарларининг донғи бутун дунёга кетган эди. Улар ўзларининг ҳалоллиги ва хушфеъллиги билан бутун бошли элатларнинг Исломни қабул қилишига ҳам сабабчи бўлиб келишган.