Исроил Бош вазири суриялик қочқинлар учун чегараларни очмаслигини эълон қилди
Исроил Бош вазири Биньямин Нетаньяху сўллар партиясининг суриялик қочқинларни қабул қилиш чақирувларини рад этди ва ноқонуний мигрантлар ва террористлар билан курашиш мақсадида чегараларни янада мустаҳкамлашга ваъда берди.
Шу билан биргаликда, у ҳукуматнинг қочқинлар ҳаётига бефарқлиги ҳақидаги айбловларни рад этди. У фуқаровий урушда яраланган мингга яқин сурияликларга тиббий ёрдам берилганлигини эслатиб ўтди. «Аммо Исроил кичкина, ўта кичкина давлат бўлиб, у демографик ва географик афзалликларга эга эмас. Шунинг учун биз ўз чегараларимизни назорат остига олиб, уни ноқонуний мигрант ва террористлардан ҳимоя қилмоғимиз керак», - деди Нетаньяху якшанба куни бўлиб ўтган маҳкама йиғилишда. Ўтган ҳафтада сўллар партияси раҳбари Исҳоқ Герцог Исроил ҳукуматини қўшни давлат бўлган Сурияда юз бераётган фожеаларга бефарқ қараб турмасдан, у ердан келган қочқинлар учун чегарани очишга чақирган эди.
Аммо вазирлар маҳкамасининг йиғилишида Нетаньяху худди Ливан, Сурия, Ғазо сектори, Миср чегараларида қурилганидек, Урдун қироллиги чегараси бўйлаб тўсиқ девор қурилишини эълон қилди. «Биз шарқий чегарамизда тўсиқ қуришни бошламоқдамиз. Биринчи босқичда Тимна ва Эйлат орасида қурилаётган аэропортни ҳимоялаш учун, кейин ушбу,тўсиқни эса Сурия чегараларида аллақачон қуриб бўлинган деворларгача узайтирамиз» - дея баёнот берди Нетаньяху. «Биз уларни («қочқинларни» - тарж.) кутиб турганимиз йўқ, балки иложи борича Исроил чегарасини ҳимоя қилувчи хавфсизлик иҳоталари ва бошқа воситалар билан тўсиб оламиз. Биз Исроил давлатини террорист ва ноқонуний мигрантлар тўлдириб юборишига йўл қўймаймиз», - деди у.
Ибн Маъруф тайёрлади