Украинадаги инқироз
Россия ҳарбий кучлари Қримда фаол ҳаракат қилишда давом этмоқда. Маъмурий ва ҳарбий қисмларнинг бинолари бирма-бир босиб олинмоқда. Бу аслида уруш деганидир. Ҳозирча ўлган ва жароҳат олганлар йўқ. Бироқ бу ҳозирча. Дунёда ҳеч қайси бир мамлакат бошқа мамлакатнинг сабабсиз бостириб киришига аслом рози бўла олмайди.
Майдон ва унинг атрофидаги низолар вақтида битта бўлса ҳам тинч юрган Россия фуқароси ўлгани ёки жабр кўргани ҳақида ҳалигача ишончли бир маълумот қайд қилинмаган. Украинанинг ҳозирги раҳбарлари ҳарбий қисмлардан тинч аҳолига қарши фойдалангани ёки фойдаланмоқчи бўлгани ҳақида ҳам бирон бир хабар йўқ. Украинанинг расмий ҳукумати Россиядан ҳарбий ёрдам сўрагани ҳам маълум эмас. Қримда ўзини ўзи бош вазир қилиб тайинлаб олганлар ҳисоб эмас.
Қўшни мамлакатнинг вилоят марказларида намойишлар уюштириб, ҳокимият биноларини эгаллаб олиш, ўз мамлакатининг байроқларини илиб қўйиш ва Украина фуқаролари бўлган русларнинг дарҳол Россия фуқаролигига ўтишларига қандай изоҳ берса бўлади? Майли оддий одамлар шундай қилса, буни балки тушуниш мумкиндир! Лекин бу ерда гап мамлакатнинг турли лавозимларида йиллар давомида ишлаб юрган мансабдорлари ҳақида кетмоқда. Зобитлар ўзларининг харбий қасамёдларини унутиб, ўзга мамлакат хизматига ўтиб кетишларини кўриб, ҳайрон қоласан киши...
БМТ Украинага қарши ҳарбий куч ишлатиш бўйича ҳеч бир мамлакатга санкция (рухсат) бергани йўқ. Тинчликпарвар бўлинмаларни (контингент) Украинага киритиш ҳақида ҳам ҳеч қандай гап бораётгани йўқ, чунки бунга ҳеч қандай сабаб йўқ. Украинага қарши Россия Федерациясининг қуролли кучларини қўллашни баъзи бир доираларнинг империалистик жиззакилиги (амбиция) деб тушунишимиз лозим бўлади. Бундай одамлар ўз мамлакати фуқароларини хавф остида қолдираётгани ҳақида ўйлаб кўрсалар яхши бўлар эди.
Марказий ОАВлари ғирт ёлғон тарғиботлари билан армиянинг қўшни мамлакатга бостириб кириши тўғри эканлигига аҳолининг аксар қисмини ишонтирмоқчи бўлишяпти. Қандай разил услублар ўйлаб топилса, улар дарҳол ишга солинмоқда. Юз минглаб украиналикларнинг Россияга қочиб ўтгани, Россия тарафини олмаган қрим татарларга исломийчилар ёки шунга ўхшаш айбловларни қўйилиши бунга мисол бўла олади. Ҳарбийларни олиб киришни талаб қилиб ўтказилаётган намойишлар ҳамма нарсадан ошиб тушди. Босқинчиликни қўллаб-қувватлаш учун ўтказилган намойиш иштирокчиларининг калласи нималарни ўйлаяпти? Калла борми, ўзи? Нормал одам уруш бўлишини, ўлимлар, қотилликлар, қонлар оқишини исташи мумкинми?
Айни вақтда Украинада фуқаролар уруши эмас, балки фуқаролар орасида сиёсий зиддият юзага келган. Бу зииддиятни бегона мамлакатлар қуроли билан эмас, фақат музокаларлар воситасида бартараф қилиш мумкин. Ҳарбий кучни фақат БМТ санкцияси билан қўллаш мумкин. Шунинг учун ҳам бугунги кунда Россия Украинага нисбатан босқинчи мақомида бўлади. Украина ва бошқа ҳар қандай мамлакатнинг бу авантюрага қилган жавоби сўзсиз тўғри ва адолатли ҳисобланади.
Жон Керри Москвага иқтисодий изоляция билан таҳдид қилди
АҚШ давлат котиби Жон Керри Россиянинг Украинадаги сиёсатини мислсиз агрессия ҳаракати дея атади ва Москвага халқаро ҳамжамият томондан бўладиган кескин муносабат, жумладан, Россиянинг тўлиқ иқтисодий яккалаб қўйилиши (изоляция) билан таҳдид қилди. Бу ҳақда 2 март, якшанба куни Reuters ахборот агентлиги хабар тарқатди.
«XXI асрда ўзини XIX юз йилликдаги каби тутиш ва бошқа мамлакат ҳудудига бутунлай ўйлаб топилган сабаб билан бостириб кириш мумкин эмас», – деди Керри АҚШнинг CBS телеканали орқали чиқиш қиларкан. Унинг қайд этишича, Россия ҳозирча воқеаларнинг энг ёмон ривожидан қутулиб қолиш ва инқирозни тартибга келтириш имкониятига эга.
Ўз навбатида, Россия президентининг матбуот котиби Дмитрий Песков Керрининг фикрлари юзасидан Reuters’га изоҳ беришдан бош тортган.
Аввалроқ, АҚШ президенти Барак Обама ҳам Россияни қоралаб чиққанди. У ҳам, агар Россия Украинага қўшинларни киритадиган бўлса, мамлакат иқтисодий яккалаб қўйилиши мумкинлигини истисно қилмаганди. Бундан ташқари, Обаманинг қўшимча қилишича, АҚШ 2014 йил июнида Сочида ўтказилиши керак бўлган «катта саккизлик» мамлакатлари саммитига тайёргарликни тўхтатган.
АҚШдан ташқари, Франция ва Канада ҳам саммитга тайёргарлик кўришни тўхтатди. Бундан ташқари, Россия раҳбариятининг қарорини Германия ташқи ишлар вазири Франк-Вальтер Штайнмайер ҳам қоралаб чиққан.
НАТО Россиянинг ҳаракатларида Европага таҳдидни кўрди
НАТО Россия сенати томонидан Владимир Путинга Украинага рус қўшинларининг олиб кирилишига рухсат берилишини бутун Европадаги тинчлик учун таҳдид дея баҳолади. Бу ҳақда 2 март, якшанба куни Reuters ахборот агентлиги альянс раҳбари Андерс Фог Расмуссенга асосланиб хабар берди.
Унинг сўзларига кўра, Россиянинг ҳаракатлари БМТ тамойилларига зид. Расмуссен Россия раҳбариятини низонинг катталашиб кетишига сабаб бўладиган ҳеч қандай ҳаракатни амалга оширмасликка чақирди. Расмуссеннинг айтишича, юзага келган мураккаб вазиятни тартибга солиш учун барча томонлар зудлик билан чоралар кўришлари керак.
Аввалроқ, Россия раҳбариятининг ҳаракатларини АҚШ президенти Барак Обама қоралаб чиққанди. Путин билан телефон суҳбати вақтида Обама, қўшинларнинг Украинага киритилиши Россиянинг иқтисодий ва сиёсий жиҳатдан яккаланиб қолиши (изоляция қилиниши)га сабаб бўлишини маълум қилган. Бундан ташқари, АҚШ июнь бошида Сочида ўтказилиши керак бўлган «катта саккизлик» мамлакатлари саммитига тайёргарлик кўришни тўхтатган.
Украинада Россия раҳбариятининг ушбу ҳаракати агрессия (тажовуз) сифатида баҳоланди. Мамлакатда умуммиллий ҳарбий сафарбарлик эълон қилинган. Украина парламенти (Олий Рада) депутатлари 2 март куни Владимир Путинга мурожаат билан чиқиш қилиб, ундан рус қўшинларини Украинага киритиш бўйича Россия сенати берган санкциядан фойдаланмасликни ва Қора денгиз флотида хизмат қилаётган ҳарбий хизматчиларни доимий жойидан олиб кетишни илтимос қилди.
Интернет маълумотлари асосида Абу Муслим тайёрлади