Бу ибодат умрни узайтириб, саратондан асрайди
Америкалик олимлар тажрибалар давомида инсоннинг узоқ умр кўриши билан ихтиёрий очлик, яъни рўза ўртасида ўзаро боғлиқлик борлигини аниқлашди.
Мутахассисларнинг аниқлашича, истеъмол қилинаётган калориялар миқдори қисқарса, организмнинг қариш жараёни ҳам секинлашар экан, деб хабар беради «Лента.ру».
Илмий истилоҳ билан айтилса, ихтиёрий очлик пайтида оқсил синтезида иштирок этаётган рибосомаларнинг фаоллиги сустлашади. Натижада организм уларни тиклаш учун у ерга кўпроқ ҳужайра ресурсларини ажратади.
Агар рибосомаларнинг емирилиш жараёни тикланиш жараёнидан тезроқ юз берса, инсонда нейродегенератив касалликлар ва саратон ўсимталари пайдо бўлар экан. Қолаверса, бу нарса инсоннинг умрини қисқартиради.
Олимлар бу кашфиётга икки гуруҳга ажратилган сичқонлар устида олиб борилган тажрибалар асносида дуч келишган. Биринчи гуруҳдаги сичқонларга оддий меъёрда овқат берилган бўлса, иккинчи гуруҳга бериладиган овқат миқдори сезиларли даражада қисқартирилади. 10 ҳафтадан сўнг ҳайвонларнинг жигаридан олинган намуналардаги рибосомалар таркиби таҳлил қилинди. Шундан сўнг олимлар рибосомалар таркибидаги турли моддаларнинг алмашинув тезлигини аниқлашган.
Маълум бўлишича, овқати чекланган сичқонларда ҳужайраларнинг бўлиниш тезлиги 25 фоизга камайган, шунингдек, ҳужайраларнинг ўзида оқсилларнинг алмашинув техлиги, яъни рибосомаларнинг фаоллиги ҳам сусайган. Айни пайтда рибосомаларнинг деградация (рибофагия) суръати ошган бўлиб, бу улардаги шикастланган қисмларнинг янгилари билан алмашинуви тезлашганини кўрсатади.