“Ямандаги гуманитар ҳалокатнинг сабаби дунё ҳамжамиятининг бефарқлигидир”, - БМТ ХК
Гуманитар масалалар бўйича БМТ бош котибининг ўринбосари Стивен ОБрайннинг айтишича, Яман аянчли ижтимоий, иқтисодий ва ташкилий-хуқуқий инқироз ёқасида турибди.
БиБиСининг хабар беришича, у БМТ Хавфсизлик Кенгаши мажлисидаги нутқида, давлатнинг бундай вазиятга тушишига сабаб бевосита дунё ҳамжамиятининг ҳаракатсизлиги ва оқибатда давлат тезкор кўмакка мухтож эканлигини таъкидлаб ўтган.
“Яман аҳолиси етишмовчилик ва турли ҳасталикларни ўз бошидан ўтказаётган бир пайтда, бутун дунё буни шунчаки кузатмоқда. У ерда инқироз яқинлашмаяпти, балки, кўз ўнгимизда кенг ёйилиб бўлди”, - деди БМТ вакили
БМТнинг маълумотига кўра, 7 миллиондан зиёдроқ яманликларга очлик хавф солиб турибди. Шунингдек, мамлакатда холера эпидемияси кенг тарқалмоқда: ҳозирга қадар бу касалликка чалинганлар сони 60 минг киши бўлиб, улардан 500 нафари ҳалок бўлган. Мутахассисларнинг башоратига кўра, яқин олти ой мобайнида яна 150 минг кишининг ушбу касалликка чалиниш эҳтимоли мавжуд.
БМТнинг махсус элчиси Исмоил Улд Шайҳ Аҳмаднинг маълумот беришича, мамлакатда тўхтамаётган ҳарбий ҳаракатлар аҳолининг қуролланишига, қурол-яроғнинг кенг тарқалишига ва пиёдаларга қарши миналарнинг кенг қўлланишига сабаб бўлмоқда. У жанг олиб бораётган икки тарафни келишувга ҳамда ҳалокатли вазиятни янада мураккаблаштирмасликка чақирди.
БМТнинг маълумотларига кўра, Яманда давом этаётган зиддиятларнинг натижасида сўнгги икки йил мобайнида 8 мингдан зиёдроқ одам ҳалок бўлган ва 45 мингдан ортиғи яраланган. Инфратузулмалари бутунлай вайрон бўлган мамлакатнинг 19 миллиондан ортиқ аҳолиси инсонпарварлик ёрдамларига мухтождир. Жанг олиб бораётган тарафларнинг бири Саудия Арабистони бошчилигидаги коалицияни қўллаб-қувватлаётган ҳукумат кучлари бўлса, бири исёнчи-хуситлардир.
Абдулатиф Иргашев таржимаси