Эрдўғон: Исроил Фаластин оккупациясини тўхтатиши лозим
Туркия президенти Режеп Тайип Эрдўғон яна бир бор Исроилдан Фаластинни “оккупация қилишга уринишларини” тўхтатишга талаб қилди.
Унга кўра, бу “араб-исроил тўқнашувининг ҳал этилиши йўлларини вайрон қилмоқда”. Бу ҳақда у Фаластин мухториянинг раҳбари Маҳмуд Аббас билан ўтказган қўшма матбуот анжуманида билдирди. “Таранглик кучайишидан мутлақо ҳеч кимга фойда йўқ. Туркия доимо тинчлик жараёнини қўллашга тайёр. Бунинг учун биринчи навбатда фаластинликларнинг ҳуқуқини ҳимоя қилиш лозим”, - деди Туркия раҳбари Hurriyet нашри келтирган иқтибосда.
Эрдўғон, шунингдек, расмий Анқаранинг позициясини эслатиб қўйди. Унга кўра, фаластинликлар ва исроилликлар ўртасидаги доимий тинчлик учун йўл мустақил Фаластин давлатини 1967 йил чегараларида барпо этиш ҳамда шарқий Қуддуси Шарифни пойтахт қилиш орқали ўтади.
Мадина Муҳаммад таржимаси