Уламолар ҳибсга олинаётгани бўйича Саудия олимларининг баёноти
БИСМИЛЛАҲИР РОҲМАНИР РОҲИМ
Мусулмон ўлкалари ва исломий ташкилотлар вакилларига:
«Ассалому алайкум ва раҳматуллоҳи ва баракотуҳу!
Биз – Саудиялик толиби илм ва уламолардан ташкил топган бир гуруҳ кишилар сизга қуйидаги маълумотни етказмоқчимиз.
Ҳижрий 1438 йилнинг 18 Зулҳижжа (2017 йил 9 сентябрь) кунидан бошлаб Саудияда дин пешволари ва ходимларидан таркиб топган бир гуруҳ олим биродарларингизни қамашди. Бу ҳолат ушбу мактубни ёзган кунимизгача давом этиб келмоқда.
Уламоларни қамашга сабаб ўлароқ уларнинг чет элликлар билан тил бириктириб давлатга қарши ҳаракат қилганлари ва мудофаа вазирлиги биносини портлатишга уринганларини рўкач қилишмоқда. Аслида эса, бу гаплар қуруқ туҳматдир.
Аслида уламоларнинг ҳибсга олиниши мамлакатда бўлиб ўтган бошқа ишлар билан боғлиқ. Шулардан бири – қамаш ишларидан бир неча кун олдин бўлиб ўтган давлат ходимларининг Суҳуюнийлар билан ўзаро ҳамкорлик келишувлари. Аслида бу ҳаракатлар ортида ҳамкорлик келишувидаги бандларни амалга ошириш ётибди. Сўзимизнинг тасдиғи сифатида БАА Америкадаги элчисининг: «Ўн йил ичида Саудия илмоний давлатга айланади», – деган сўзини келтиришимиз мумкин. Элчининг бу сўзи ушбу ҳаракатлар бошланганини кўрсатиб турибди. Бундан ташқари, ҳукумат сиёсатига қарши чиққан баъзи амирларга кўрсатилган тазйиқлар ва валиаҳд оиласига кўрсатилаётган зулмлар ушбу сўзларнинг ҳақиқатга нақадар яқинлигини намоён қилмоқда.
Шуни таъкидлаш лозимки, ҳозирги кунда қамалган эркагу аёл олимларнинг барчаси мамлакатнинг энг жонкуяр ва фидойи инсонларидир. Улар мутаассибликка қарши бўлган, мўътадилликни лозим тутган энг сара олимлардир. Улар ҳақида телевидение ва ахборотда айтилган барча гаплар бўҳтондир.
Биз бу каби ҳибсга олиш ишлари ҳали давом этади, деб ўйлаяпмиз. Шуларни ўйлаб сиз азизларга ушбу мактубни ёзишга ва буни бутун дунёга тарқатишга қарор қилдик. Кўзлаган мақсадимиз ушбу муборак юрт ва унинг уламоларини зулм-ситамлардан ҳимоя қилишдир.
Ушбу мақолани кечикиб ёзганимиз учун сизлардан узр сўраймиз.
Аллоҳдан мазлумлардан зулмни кўтаришини ва ҳибсда ётганларни озод қилишини сўраб дуо қиламиз!
13.09.2017м/ 22.12.1438ҳ
Манба: iumsonline.org