Пентагон Трампни ўз луғатидан «ислом терроризми» атамасини ўчиришга мажбур қилди
Қўшма штатларда Дональд Трампнинг ашаддий тарафдорлари президент нега ўзининг хавфсизлик мавзусига бағишланган икки нутқида кутилмаганда «ислом терроризми» атамасидан воз кечганига тушуна олмаяптилар.
2001 йил 11 сентябрь воқеалари содир бўлган кун муносабати билан Трамп нутқ сўзлади ва АҚШ да терактлар содир этганларни террорчилар, душманлар, ваҳший қотиллар деди, аммо одатидан воз кечган ҳолда бирон марта «ислом терроризми» атамасини қўлламади.
Ашаддий исломофоблар, улар орасида Трамп тарафдорлари ҳам кўп, ҳайрон қолишди ва ҳатто президентнинг бундай оҳангидан норози ҳам бўлишди.
Washington Times нашри ҳокимият тизимига президентнинг нутқи борасида мурожаат қилди ва шундай жавоб олди: Трамп нутқини исломофоб оҳанглардан Пентагон тозалаган – айнан унинг тавсияларига кўра президент нутқида динни тилга олмаган.
Таъкидлаш жоиз, АҚШ мудофаа вазири Жеймс Мэттис экстремистларни “ясама диний кийимлар билан ниқобланган маньяклар” деб атади.