Туркия президентига суиқасд иши бўйича суд якунланди
Президент Ражаб Тойиб Эрдўғонга суиқасд қилишга уринган шахслар устидан суд ҳукм чиқарди.
Туркияда «Параллел давлат» (FETÖ) ҳаракати тарафдорлари устидан суд жараёни якунланди. Маҳкамага тортилганлар 2016 йилнинг 15 июль кунга давлат тўнтаришига уриниш пайти президент Ражаб Тойиб Эрдўғонни жисмонан йўқ қилмоқчи бўлганлар.
Давлат раҳбарига суиқасд иши бўйича 47 киши маҳкамага тортилган бўлиб, улардан 43 таси судланувчи ўриндиғида ўтирибди.
Гумонланувчилар рўйхатида биринчи ўринда FETÖ раҳбари, ҳозирда АҚШнинг Пенсилвания штатида яшовчи Фатҳуллоҳ Гулен турибди.
Эрдўғонга суиқасд қилишга уринганлар гуруҳининг раҳбарлари Шукру Саман ва Закариё Қўзи тўрт марта бир умрлик қамоқ жазосига ҳукм қилинган. Собиқ генерал Кўкхон Шахин Сўнмасоташ ҳам худди шундай муддатга озодликдан маҳрум этилган.
Президент Эрдўғоннинг ҳарбий масалалар бўйича собиқ маслаҳатчиси Али Ёзучига шу иш бўйича 18 йиллик қамоқ жазоси берилди.
Давлат тўнтаришига уриниш бўлган куни қўпорувчилар гуруҳи президент Эрдўғон дам олаётган Муғла қишлоғининг Мармарис районида жойлашган «Grand Yazıcı Otel» меҳмонхонаси яқинида вертолётдан тушадилар.
Вертолёт аввалига президент турган меҳмонхонани ўққа тутади, кейин эса қуруқликдан исёнчилар ҳужум қиладилар. Отишмада суиқасдга қаршилик кўрсатган икки полициячи вафот этган.
Давлат раҳбари суиқасд ҳақида огоҳлантирилган ва Гулен тарафдорлари вертолётдан тушаётган пайти меҳмонхонани тарк этган эди.
Туркия ҳарбий кучларининг Фатҳуллоҳ Гулен террорчилик ташкилотига аъзо бўлган бир гуруҳ хизматчилари 2016 йил 15 июлдан 16 июлга ўтар кечаси мамлакатда ҳукуматни ҳарбий тўнтариш йўли билан қўлга олишга уринди. Бунинг натижасида 250 киши ҳалок бўлди.