АҚШ давлат департаменти Трампнинг кескин сўзлари туфайли хижолатда қолди
АҚШ давлат департаменти президент Дональд Трампнинг Исроил бош вазири Беньямин Нетаньяхуга нисбатан айтган кескин сўзлари борасида бирон шарҳ бермади.
Гап Haaretz газетасида чоп этилган мақола устида кетяпти. Мақолада айтилишича, Трамп сентябрь ойи БМТ бош котиби Антонио Гутерриш билан Бош Ассамблеянинг 72-сессияси пайти учрашганда, Нетаньяхунинг Фаластин-Исроил низосини бартараф этиш масаласига нотўғри ёндашаётганидан шикоят қилган. Нашрнинг маълумотларига кўра, Трамп Нетаньяхунинг хатти-ҳаракатини “катта муаммо” деб баҳолаган. Шунга қарамай, Давлат департаменти матбуот хизмати раҳбари Хазар Науэрт бу ҳақида ҳеч нима эшитмаганини айтди, дея хабар беради ТАСС. “Мен президентнинг бундай гапларидан бехабарман”, – деди Науэрт журналистларга. Айни вақтда, у АҚШнинг бу масалага муносабатини тасдиқлади, яъни Исроилнинг Фаластин ҳудудига“тийиқсиз кўчиш сиёсати” “тинчлик истиқболларини мустаҳкамламайди” деб ҳисоблайди Вашингтон.
«Бизнинг бу борадаги муносабатимиз ўша-ўша. Президент ҳар икки томонга ҳам тарихий тинчлик келишувига эришишларида ёрдам бермоқчи», – қўшимча қилди Науэрт. Аммо АҚШ маъмурияти Трамп Нетаньяхуга нисбатан салбий оҳангда гапирганини рад этмаяпти. Оқ уйдаги манбанинг сўзларига кўра, АҚШ президенти «Яқин Шарқ зиддиятида ҳар икки томон ҳам тинчликка эришишни истайди деб ўйлаяпман ва мен бу масалага некбинлик билан қарайман», – деган.