Яман жанубида референдумга тайёрланмоқдалар
Яман ўтиш даври сиёсий кенгаши мамлакатнинг сиёсий яхлитлиги борасида референдумга тайёргарлик бошланганини эълон қилди.
Референдум ташаббускори «Ал-Хироқ ал-Жанубий» (Жануб ҳаракати) номли ҳаракатдир, айнан у ўтиш даври сиёсий кенгашига асос солганди.
Референдум тарафдорлари уни мамлакатнинг жанубий ҳудудларида ўтказишни режалаштирмоқдалар.
Кенгаш раиси Айдарус аз-Зубайдий маҳаллий ОАВга берган интервьюсида референдумга тайёргарлик бошлангани ҳақидаги маълумотни тасдиқлади, аммо режалаштирилаётган овоз бериш жараёнининг майда тафсилотларини маълум қилмади.
Айни пайтда Зубайдий 1963 йилги инқилоб (Яманда Британия мустамлакасига чек қўйилган кун) тантанаси нишонланадиган 14 октябрь куни бир қатор муҳим баёнотлар қилишини айтган.
Яман шимоли 1918 йил Усмонлилар давлатидан ажралиб чиққач мустақилликни қўлга киритган эди, жануби эса 1967 йилнинг 30 ноябригача Британия мустамлакаси остида қолди.
1990 йилнинг 22 май куни шимол (Яман араб Республикаси) ва жануб (Яман Халқ республикаси) ягона Яман далатига бирлашишга қарор қилди.