Ҳиндистон суди яна бир муслимага босим ўтказяпти
Ҳиндистоннинг Рожастон штати олий суди аввал Керала штатида катта шов-шувга сабаб бўлган воқеани такрорлашга аҳд қилди.
Ўшанда ёш индуист қизнинг Исломни қабул қилиши жиноятга тенглаштирилган ва унинг эрки чекланган эди. Суд Рожастонлик 22 яшар қизнинг динини ўзгартириб кейин мусулмон йигитга турмушга чиққанини ноқонуний деб баҳолади ва уларнинг никоҳини бекор қилди. Исломни янги қабул қилган қизни эса бир ҳафтага давлат муассасига қайта тарбиялашга жўнатди, деб хабар беради IslamNews сайти Hindustan Times га таяниб. Туғилганда Пайял деб исм қўйилган, Исломни қабул қилгач Орифа деб аталган қизнинг акаси синглисининг бошқа динга ўтганига чидолмай судга ариза берган эди.
Аввалроқ Керала штатида ҳам Ҳадия исмли Исломни қабул қилган қиз отасининг судга мурожаати ортидан уй қамоғига ташланиб, мусулмон йигит билан никоҳи бекор қилинган эди. Кейинча Ҳиндистон Олий суди Ҳадиянинг эри томонидан келтирилган даллиларни инобатга олиб қуйи инстанция чиқарган маҳкама қарорини бекор қилган эди.