АҚШнинг аралашуви Яқин Шарқдаги муаммоларнинг сабабидир
Сочида Россия ва Судан президентларининг учрашуви бўлиб ўтди.
Сўнгги пайтларда Яқин Шарқ ҳудуди бошига тушган муаммолар АҚШнинг аралашуви оқибатидир, деди Судан президенти Умар Ал-Башир ўзининг россиялик ҳамкасби Владимир Путин билан пайшанба куни Сочида бўлиб ўтган учрашувида.
Унинг сўзларига кўра, Судан Америка сиёсатининг натижаси ўлароқ икки мамлакатга ажралиб кетди ва бу вазиятнинг оғирлашувига олиб келди.
Сурияда бўлаётган ишларнинг ҳам сабаби Америкадир, деди Ал-Башир ишонч билан. Бундан ташқари, Судан АҚШнинг Қизил денгиздаги ишларидан ҳам хавотирда, хусусан, у ерда Америка ҳарбий базаларининг ташкил этилишидан.
Президентнинг таъкидлашича, Россия ва Судан ўртасида ҳарбий-техник соҳада конструктив ҳамкорлик йўлга қўйилган. Судан пиёда аскарлари ва авиацияси Россияда ишлаб чиқарилган қуроллардан фойдаланади.
Ал-Баширнинг маълум қилишича, сал аввалроқ у Россия мудофаа вазири Сергей Шойгу билан ҳам учрашди, унда Судан ҳарбий кучларини қурол-яроғ билан қайта таъминлаш ва бу борада Россиянинг ҳамкорлиги ҳақидаги келишувга эришилган.