Мусулмон дўкондор муҳтожларга бепул егулик тарқатмоқда
Озиқ-овқат банкига талабнинг ортиши туфайли Шотландиядаги Пейсли шаҳрида дўкони бўлган Раҳмон Афзал ўз музлаткичларидан бирини муҳтожлар учун егуликларга тўлдириб қўйди. Бу билан у муҳтожларнинг эҳтиёжларини қондиришни мақсад қилган.
(Озиқ-овқат банки (англ. food bank) — ишлаб чиқарувчилардан озиқ-овқат масулотларини йиғиб олиб муҳтожларга тарқатидиган инсонпарварлик ташкилоти – тарж. изоҳи).
Атрофимиздаги одамлар – ким бўлишидан қатъи назар – агар муҳтож бўлиб қолсалар, ушбу бепул музлаткичдан фойдаланишлари мумкин. Бу уларнинг аҳволи ўнглангунча давом этиши мумкин», – деди у ВВС га интервьюсида.
Харидорлар ўз ихтиёрлари билан бу музлаткични тўлдиришлари ёки бунинг учун пул қолдиришлари мумкин. Музлаткичдан нарса олмоқчи бўлганлар ҳукуматдан ёрдам пули олишларига Раҳмонни ишонтиришлари керак, шундагина хўжайин музлаткичдан кунига иккита нарса олишга рухсат беради. У бундай музлаткичларнинг зарур эканини, улар озиқ-овқат банкидан самаралироқлигини таъкидлади.
«Одамлар озиқ-овқат банкига боргунча, ёнларидаги дўконга чиққанлари қулайроқ. Балки, улар ўз муаммоларини ҳеч кимга айтгилари келмас», – деб ҳисоблайди у.
«Банкларнинг муаммоларидан бири, уларга исталган соатда мурожаат этиб бўлмаслигидир. Пейслидаги озиқ-овқат банки ҳафтада уч кунгина ишлайди – одамлар бошқа кунлари нима қилсинлар?»
«Жамоатчилик музлаткичларини эса кўпроқ дўконларга ўрнатиш мумкин. Дўконлар доим очиқ туради».
«Менимча, у банкларни бутунлай ёпиш керак. Улар фақат маълум соатларда ишлар эканлар, ҳеч қачон мақсадларига тўлиқ эриша олмайдилар».
Биз ушбу ғояни бошқа дўконлар ҳам илиб олишлари ва кўпроқ шундай музлаткичларни жорий этишларидан умидвормиз. Улардан кўплаб муҳтож инсонлар қийин дамларда фойдаланар эдилар.