Жанубий Африка Фаластин сабаб Исроил билан алоқаларни узди
Африка Миллий конгресси (АМК) Жанубий Африка республикасида етакчи ва ёши энг катта сиёсий ташкилотдир. Ўтган ҳафта у Исроилнинг истилочилик сиёсатидан норозилик белгиси сифатида у билан дипломатик алоқаларни узиш ҳақида қарор берди.
Қарор АМКнинг миллий сиёсат бўйича анжуманида қабул қилинди ва «инсон ҳуқуқлари ва Фаластин халқининг ҳимояси борасида катта ғалаба» деб баҳоланди.
Баёнот апартеид тизими билан курашган ва АМКнинг 1967–1991 йиллар давомида президенти бўлган таниқли сиёсатчи «Оливер Тамбо» номи билан номладилар. Унда айтилишича, ЖАРнинг Исроил билан дипломатик алоқаларни узишига асосий сабаб «Фаластиннинг Исроил томонидан анчадан бери давом этаётган ноқонуний истилоси ва фаластинликларга нисбатан инсон ҳуқуқлари бузилиши ҳақида кучли огоҳлантириш бериш»дир.
«Резолюция АМКнинг етакчи партия сифатида кучли ва аниқ позицияси ифодаси бўлди», дейилади хабарда.
«Исроил ва бошқа золим режимларнинг апартеид сиёсати туфайли уларга нисбатан жазо чоралари қўллаш ва алоқаларни узишга чорлаётган биз каби ташкилотлар Тамбонинг издошларидир. Исроил ва унинг ҳамкорлари бу баёнотимиздан сўнг бирон чора кўриб вазиятни ўзгартирадилар деган хомхаёлларга берилмаймиз, аммо халқимизнинг манфаати учун бу позициямизда қатъий турамиз. Биз Исроилни сиёсатимизга аралашмасликка, айни пайтда Фаластин билан тинчликка эришишга чақирамиз», – дейилади хабарда.
Фаластиннинг ЖАРдаги элчиси Ҳошим Дажоний бу қарорни олқишлади ва уни Исроилнинг апартеид сиёсатига чек қўйишга чақирув деб қабул қилди.
Дажоний бу ҳаракат фаластинликларнинг ўз тақдирини ўзи белгилаш ва мустақил давлатини қуриш ҳуқуқини тан олиш деб ҳисобланади.
ЖАРнинг Фаластин билан дўстлик алоқалари узоқ тарихга эга. Уларнинг тарихи ўхшаш. Фаластинликлар Исроил томонидан истило этилган бўлса, ЖАР ўнлаб йиллар апартеид остида яшаган.
Бутун дунё ҳурмат қиладиган шахс, ЖАРнинг сўнгги президенти Нелсон Мандела Исроил сиёсатига қарши дадил чиқишлари билан фаластинликлар қалбидан алоҳида ўрин эгаллаган. Ҳамма унинг 1997 йилда айтган гапини яхши эслайди: «Фаластинликлар озодлигисиз бизнинг озодлигимиз ҳеч қачон тўлиқ бўлмайди».