Қочқинлар: Европада одамгарчилик йуқ
Турли мамлакатлардан Францияга қочиб келган юзлаб муҳожирлар январнинг совуқ кунларини Париж кўчаларида ўтказишмоқда. Изғиринли шамол ва қаҳратоннинг совуғидан қочоқлар ўзларини кичик чодирларга урмоқда.
Муҳожирларни янги кириб келган йилдан умидлари сўниб бўлган. Уларда яшаш учун жой, ейиш учун овқат ва кун кечириш учун пул йуқ. Франция президенти Эмануэл Макроннинг қочоқларга ёрдам бериш ҳақидаги ҳитобига қарамай францияликларнинг муҳожирларга бўлган муносабати яхши эмас. “Анадолу” билан бўлган суҳбатда Париждаги муҳожирлар маҳаллий аҳолидан шикоят қилишган. Францияга Афғонистондан келган Зоҳир етти ойдан бери кўчада яшаётганини айтди. “Сиз ҳозир кўриб турган қочоқларнинг бари уйсиздир. Европада одамгарчилик ҳукмрон, немис ва французлар инсонпарвар бўлишади деб кўп эшитганман. Бироқ бу ерга келгач, буни аксини кўрдим. Бу ерликлар қочоқларга ёмон муносабатда бўлиб уларга паст назар билан қарашмоқда. Биз бу ерда ҳеч кимга керак эмасмиз” дейди у. Покистонлик муҳожир Абад эса қочоқлар Европанинг ҳеч бир мамлакатида кўрмаган ҳўрликларни Парижда бошларидан ўтказаётганини айтди. Тунислик муҳожир Шоирнинг сўзларига кўра, шу кунларда совуқдан бешта қочоқ ҳаётдан кўз юмганини ва бу билан ҳеч кимнинг иши бўлмаганлигини гапирди. Ливиядан Францияга келган Муҳаммаднинг айтишича, муҳожирларнинг яшаш шарт-шароитлари тўғрисида одамлар билиши керак. Афғонистонлик Гулнинг сўзларига кўра, Франция пойтахтида об-ҳаво совуқ, яшаш учун бошпана йуқ, устига устак полиция уларни у жойдан бу жойга ҳайдар экан. Франция шаҳарларида рўй бераётган бу фожеали ҳодисаларнинг сабаби қочоқлар учун мўлжалланган лагерлар етишмаётганлигидир. Ўтган йили Франция бош вазири Эдуард Филипп 40 фоиз қочоқлар кўчада яшаётганлигини расман тан олиб, у шу тарика ҳукумат қочоқлар оқимига бардош бера олмаётганини эътироф этганди. Маълумот учун, 2016 йилнинг ўзида Францияга 85 минг одам келган.