ОАВ: Эронда Маҳмуд Аҳмадинажот ҳибсга олинди
Араб ОАВ ларига кўра, Эрон собиқ президенти яқинда бўлиб ўтган намойишларни гижгижлагани ва у ердаги қатнашчиларни қўллаб қувватлагани учун уй қамоғига олиниши мумкин.
Манбаларга кўра, Маҳмуд Аҳмадинажот декабрь ойининг охирида амалдаги ҳокимятни танқид қилиб, баъзи давлат мулозимларининг оёғи ердан узилиб оддий халқ ҳаётидан бехабар эканликларини айтган. Шу билан бирга, у Ҳасан Руҳоний ҳукуматини давлатни яхши бошқара олмаётганлигида айблаган. Маълумотларга қараганда, айнан шу сўзлар уни ҳибсга олинишига сабаб бўлган. Ҳукумат бу хабарни расман тасдиқламаган. Қолаверса сиёсатсуношлар ушбу хабарнинг ҳақиқийлигига шубҳаланмоқда. Эслатиб ўтамиз, Маҳмуд Аҳмадинажот 2005 йилдан 2013 йилга қадар Эрон президенти бўлган. Давлатнинг энг юқори лавозимини эгаллашдан олдин эса у Теҳрон ҳокими вазифасини бажарган.