АҚШнинг собиқ давлат котиби Фаластинни Трампга бўш келмасликка чақирди
АҚШнинг собиқ давлат котиби Фаластинни Трампга бўш келмасликка чақирди
Яқин Шарқнинг қатор ОАВлари АҚШнинг собиқ давлат котиби Жон Керрининг Фаластин маъмурияти раҳбари Маҳмуд Аббосга мактуб ёзгани ҳақида хабар тарқатдилар. Мактуб Доналд Трампнинг сўнгги ишлари туфайли ёзилгани ва Керрининг Лондонда Ҳусайн Оға (Аббоснинг яқин маслаҳатчиси) билан учрашуви чоғи бериб юборилгани айтилмоқда.
Хабарларда қайд этилишича, Керри Аббосни маҳзун бўлмасликка ва узоқ муддатни кўзлаб ҳаракат қилишга чақирган. Керрининг фикрича, Трамп АҚШ президенти лавозимида узоқ ушланиб қолмайди, шу сабабли у Аббосдан ўз танқидларини умуман Америка ва унинг маъмуриятига эмас, шахсан Трампнинг ўзига қаратишини маслаҳат берган.
Бундан ташқари, хабар қилинишича, Керри Фаластин мухториятидан ўзининг муфассал тинчлик режасини ишлаб чиқиб эълон қилишини сўраган. Эслатиб ўтамиз, яқинда Трамп томонидан ишлаб чиқилган ва Фаластинга тақдим этилган режага кўра, мухторият Исроилга абадий қарамлигини тан олиши керак эди.
Жон Керри АҚШдаги 2-рақамли шахс мақомида бўлган вақтларида ҳам Исроил раҳбариятининг, хусусан, Трампнинг яқин дўсти Бенямин Нетаняхунинг самарасиз ва гижгижловчи сиёсатини кўп танқид қилган эди.