ОАВ: Яна роҳинжаларнинг оммавий қабрлари топилди
Мянмадан даҳшатли хабарлар келишда давом этмоқда: у ерда ҳарбийлар ва буддистлар томонидан ўтказилган қирғинда қурбон бўлган роҳинжаларнинг яна бир оммавий қабрлари топилган.
Хабарда айтилишича, Гу Дар Пиин қишлоғида учта шундай оммавий қабр топилди. Бу ерга ҳарбийлар ўтган йилнинг 27 августида ҳужум қилган эдилар.
«Ассошиэйтед пресс» агентлиги гувоҳларнинг кўрсатмаларига ва видеоматериалларга таяниб хабар беришича, қишлоқ аҳолисининг катта қисми ўлдирилган ва қурбонлар шахсини аниқлаш имконини йўққа чиқариш учун уларнинг юзлари ва панжаларига кислота қуйилган. Ўлганларнинг умумий сони тахминан 400 та дейилмоқда. Аввалроқ Мянма ҳукумати Ракхайн штатининг денгиз қирғоғида жойлашган Ин Динн қишлоғида топилган биргина оммавий қабрнинг мавжудлигини тан олган ва у ерга дафн қилинганларнинг бари «террорчилар» эди деган.