БМТ Мянма ҳукуматини огоҳлантирди
Роҳинжа халқига нисбатан зўравонликлар бутун ҳудудда зиддиятларни юзага келтириши мумкин. БМТ шундай фикрда.
Мянмадаги роҳинжа халқига нисбатан тўхтамаётган зўравонликлар бутун ҳудудда зиддиятларни юзага келтириши мумкин, дея огоҳлантирди БМТнинг инсон ҳуқуқлари бўйича Олий комиссари Зайд Раъд ал-Ҳусайн.
Индонезияда бўлиб ўтган инсон ҳуқуқлари бўйича анжуманда Ҳусайн Аракондаги мусулмонларга нисбатан геноцид ва этник тозалаш услублари қўлланган бўлиши мумкинлигини айтди.
«Мянма бутун ҳудуддаги хавфсизликка таҳдид солувчи зиддият қаршисида турибди. Инсон ҳуқуқларининг бузилиши бугун бўлмаса эртага қуролли тўқнашувларга олиб келиши мумкин», деди ал-Ҳусайн.
«Аракондаги сўнгги инқироз эса 50 йил давомида роҳинжа мусулмонларига қарши олиб борилаётган камситиш сиёсатининг ва зўравонликларнинг оқибатидир», таъкидлади Ҳусайн.
«Агар тўқнашувлар катта диний зиддиятларга айланиб кетса, бу келгусида рўй беражак қарама-қаршиликларга жиддий туртки бериши мумкин», қўшимча қилди у.