Орбан ЕИ сиёсатчиларини исломга йўл очаётганликда айблади
© РИА Новости / Сергей Гунеев
Венгрия Бош вазири Виктор Орбан ўз бошчилигидаги ҳукумат Европа Иттифоқи (ЕИ) ва Бирлашган Миллатлар Ташкилотининг (БМТ) дунё бўйлаб миграцияни кенгайтириш уринишига қарши чиқишини билдирди.
Ассосиэйтед Пресс агентлиги хабарига кўра, Орбан бу гапни 18 феврал куни Венгрия халқига қилган анъанавий мурожаатида айтган.
Брюссел, Берлин ва Париж сиёсатчиларини “насроний маданиятини сусайтириш ва исломни илгари суриш”да ҳисса қўшаётганликда айблаган Венгрия Бош вазири “насронийлик Европанинг охирги умиди экани”ни таъкидлади.
Виктор Орбан ўз нутқида “ислом яқин фурсатда Марказий Европа эшикларини ҳам ғарб, ҳам жануб томондан тақиллата бошлаши”ни алоҳида урғулади.
Орбан Ғарбий Европа қандай қилиб аста-секин мусулмонлашиб бораётганини мисол қилиб кўрсатди.
“Мингрантлар биринчи навбатда йирик шаҳарларга ўрнашиб олаётгани боис улар Германиянинг йирик шаҳарларидан маҳаллий халқларни сиқиб чиқармоқда”, - дея таъкидлади Орбан.
Унинг ушбу баёноти мамлакатда апрел ойида парламент сайлови ўтказилишидан олдин янгради. Сайловда Виктор Орбан Бош вазир лавозимига учинчи марта сайланишга умид қилмоқда.